Падчас рабочай паездкі ў Брэст Прэзідэнт Беларусі Аляксандр Лукашэнка абазначыў ключавыя задачы для аграрыяў на перыяд уборачнай кампаніі.

Паводле слоў кіраўніка дзяржавы, у цяперашнім сезоне неабходна забяспечыць ураджай не ніжэй за леташні ўзровень.

— Цяпер трэба ўбраць хлеб. У цэлым па краіне (ураджай. — Заўв.) павінен быць не ніжэй за ўзровень мінулага года. Калі 12 млн тон дасце — гэта будзе вялікае дасягненне, — падкрэсліў Аляксандр Лукашэнка.

Лукашэнка растлумачыў, што дапаможа дабіцца выніку

Прэзідэнт звярнуў асаблівую ўвагу на захаванне працоўнай і тэхналагічнай дысцыпліны, адзначыўшы, што менавіта ад гэтага шмат у чым залежыць вынік работы.

Паводле яго слоў, беларусы здольныя дабівацца высокіх вынікаў, калі дысцыпліна будзе захоўвацца на ўсіх узроўнях.

— Усё можам, калі ёсць дысцыпліна. Дзе Прэзідэнт праехаў, там добра. Але ж я не ўсюды бываю, — заўважыў кіраўнік дзяржавы.

Кіраўнік дзяржавы заклікаў прывучаць людзей да дысцыпліны

Аляксандр Лукашэнка падкрэсліў, што поспех у сельскай гаспадарцы наўпрост залежыць ад арганізаванасці і адказнасці.

— Трэба наш народ прывучаць да дысцыпліны. Будзе дысцыпліна — мы ўсё зможам, — заявіў Прэзідэнт.