Што цікавага чакае гасцей і ўдзельнікаў Форуму рэгіёнаў Беларусі і Расіі

Заўтра, 25 чэрвеня, стартуе XIII Форум рэгіёнаў Беларусі і Расіі. Яго галоўная тэма — «Эканамічнае ўзаемадзеянне рэгіёнаў — аснова ўстойлівага развіцця Беларусі і Расіі». У мерапрыемствах, якія пройдуць у Мінску і Мінскай вобласці, прымуць удзел прадстаўнікі ўсіх абласцей Беларусі і большасці рэгіёнаў Расіі. Што ж цікавага чакае гасцей і ўдзельнікаў форуму?

У рамках форуму адбудзецца сустрэча старшыні Савета Рэспублікі Наталлі Качанавай і старшыні Савета Федэрацыі Валянціны Матвіенка з кіраўнікамі органаў дзяржаўнай улады суб’ектаў Расіі і рэгіёнаў Беларусі і пленарнае пасяджэнне. У апошнія гады назіраецца актывізацыя гандлёва-эканамічнага ўзаемадзеяння дзвюх краін. У мінулым годзе абноўлены гістарычны максімум узаемнага гандлю таварамі і паслугамі. Ён склаў 62 мільярды долараў. Па выніках чатырох месяцаў гэтага года аб’ём знешняга гандлю вырас яшчэ на 20 працэнтаў. Пры такой дынаміцы ёсць усе шанцы дасягнуць 70 мільярдаў долараў тавараабароту ў гадавым выражэнні.

На палях форуму плануюць падпісаць дзясяткі новых пагадненняў і дарожных карт, а сума заключаных дагавораў, як чакаецца, складзе больш за 900 мільёнаў рублёў.

Акрамя дзелавой праграмы, арганізатары падрыхтавалі насычаную культурную частку, у ходзе якой госці змогуць пазнаёміцца з галоўнымі славутасцямі Мінска і Мінскай вобласці. Форум заўсёды суправаджаюць некалькі важных маладзёжных праектаў — гэта «Цягнік Памяці» і «Гарады-героі — гарады герояў».

Па ўсталяванай традыцыі да Форуму рэгіёнаў Беларусі і Расіі пройдзе выстава-кірмаш з удзелам беларускіх і расійскіх вытворцаў, рамеснікаў, прадстаўнікоў бізнесу і гандлю. Сёлета месцам яе правядзення выбрана пляцоўка Мінскага міжнароднага выставачнага цэнтра BELEXPO. У першы дзень, 25 чэрвеня, выстава-кірмаш прыме дэлегатаў форуму і партнёраў для правядзення дзелавых сустрэч. 26 чэрвеня выстава будзе адкрыта толькі для афіцыйных дэлегацый. У суботу, 27 чэрвеня, — для ўсіх гасцей і наведвальнікаў з 11:00 да 18:00. Уваход бясплатны.

На выставе будзе прадстаўлена ўнікальная касметыка з Пскова, закускі і джэркі ад вытворцаў з Уладзімірскай вобласці, рыбная прадукцыя, ювелірныя вырабы і ўпрыгожанні з Калінінградскай вобласці, пернікі, хусткі і рускія народныя паясы, музычныя інструменты з Тулы, гжэльскія фарфоравыя вырабы ад легендарнай фабрыкі з Маскоўскай вобласці, а таксама тысячы найменняў прадукцыі і дэкору ад рамеснікаў і майстроў мастацтваў з Расіі.

У складзе беларускай экспазіцыі — найбуйнейшыя прадстаўнікі прамысловасці, навукі, сельскай гаспадаркі, прыватныя вытворцы і спецыялізаваныя вытворчасці. Знакамітае марожанае з Кобрына, бабруйскі зефір, ёгурты, любімыя многімі намазкі і мясныя пасты з Брэста, вафельныя і бісквітныя вырабы з Віцебска, вядомую кандытарскую прадукцыю з Гомельскай вобласці, згушчонку і прысмакі, мясную і малочную прадукцыю, тэкстыль і галантарэю, тавары для дзяцей убачаць на стэндах госці выставы. Кожны наведвальнік зможа знайсці прадукцыю на свой густ і кошт.